ZO THLANGTLAK RUN

Zo Thlangtlak Run

Chhinlung chhuak Zofate hi chhui phak loh leh hriat phak hunbi chhungah khawvel hmun hrang hrangah thlang kan tla thin a. China ram atangin Chindwin leh Irawdi luipui kamah, Chin Hillah, Khampat atangin Tiau kamah, tuna Mizoramah, Bangladesh ramah thlang kan lo tla tawh a. Sap Misawnnariten Chanchin Tha eng hmangaih khawngaih, ngaihdamna leh chhandamna huangchhunga min hruai luh atangin khawvel hmasawnna hlang tam takah rang taka hlan chhoh kan ni a. Pipute phun Khampat bungpuiin zung a thlak a, an lo hrilhlawk angin Zo chhuan tharten pipute sulhnu Kabaw leh Kaley phai kuamah vangkhua kan din thar leh ta a. Kabaw leh Kalay phai zawl atangin Burma ram khawpui Yangon, Mandalay leh hmuan hrang hrangah khawsak fuhna zawngin kan pem nual bawk a. Kum zai 21 a lo inher chhuak a, Burma rama Zofate chu "Zo Thlangtlak Nun thar leh hunbi thar ah kan chuangkai tan ta a. Tlangzarh loh thuruk khirh hmangin Zo hnam leh sakhaw tihmang tuma min chungthlaktu sorkar nungrawng khuahkhirh nun leh retheihna lak ata zalenna, sahimna, eibar hmuhna tha zawngin India, Thailand leh Malaysia ramah thalai rual tam tak, a hnuah nu leh pa, naupang tam tak telin, thlang kan tla ta vut vut a. Chung ramah chuan vangkhaw thar kan din leh ta a. Heng vangkaw run thar hi Zofate thlangtlak ramtiam, zalenna leh khawsakna hlawhtling pumhlum kan channa tur kalkawnga "kan cham lawkna, kan inbuatsaihna ramte an ni a. Heng ramah hian mi hamthate, kamdingte hnathawh kalhmang zirin rim takin, mahse zalen tak leh hlawk takin mahni thawhraha chhung chawm theiin Zo hringnun kan hmang a. Chutih rual chuan ni tin, chawlhkar tin leh thla tin mai hian mimal, leh chhungkua pakhat te tein kan thlangtlakna ramtiamah kan lut zel bawk a ni. Ngiahtuah tur pawimawh tak kan neih chu: (1) Zo thlangtlakin a tum hi hnam leh sakhaw humhalna leh hmasawnna tukverh atanga zirchian a, hmalak zel (2) Kan thlangtlakna rama nunphung thar, ram tharah Zo chhuan thar tam tak lo la awm turte khawvel huapa Pathian leh hringfate malsawmtu an lo nih theih nan thiamna, politics leh economics-a dinhmuh nghet neih (3) Piputen Mizoram lama thlang an tlak hnu, Chanchin Tha, pipute nuna a lo luh kum 1894 atanga kum 2000 chhunga hma kan sawn chhoh dan aia a tet tam taka hmasawn tur kan nihzia hriat chhuah a, beihpui thlak zel. Pipute zoram tlang dung leh vanga thlang an tlak lai khan an zuk khawsakna zo khaw tharah ram thar, chul thar tur a awm tih mai loh chu hmasawnna tur kawng dang a awm lem lo. Chanchin Tha a lo luh lai pawh khan kan pipute economics leh politics kha a la hniam hle a ni. Chutianga ei bar zawnna, politics leh khawsakna thim atang maha heti khawpa hma kan sawn chhoh theih chuan, tuna kan thlangtlakna hmun ram thumna atang chuan a let engemaw zata tamin hma kan sawn ang a, kan changkang hle thei a ni.

 

 

Recent Prayer Requests

  • Kohhran Kum thar inthlanna

    Tamu Methodist kohhran chuan ni 5 Jan chhunah Kohhran dan dinglai No. 43(e) (ii): Full member zawng zawngin Stewards mi 8, Leaders mi 10 leh Kohhran aiawhte mi 10 nominate-in th...
  • Damlo Tv. Chhandingliana tan

    Tamu Methodist kohhran thalai, Tv. Chhandingliana chuan ni 23 Dec, 2013 zan khan nasa takin accident a tawk a, Imphal damdawi inah zai a ni a. Pathianin min la chelhsak avangin ...