ZO THLANGTLAK RUN

HLUI ZUN NGAI ZALENNA

HLUI ZUN NGAI ZALENNA

Hei hi thil ni thei leh mawi hnai ve tak han chin zui chi ni hian keimahah chuan a thawk hlawl lo.  Mawi tih chu sawi loh, mihringte tan a tangkaina tur kawng pakhat mah ka hmu thlawt bawk lo. Ka tih atan ka duh loh ang bawkin thiante hman atan ka duhsak hauh lo bawk. Ka ruih bosan emaw ka hlamchhiah ve hrim hrimah thlirtuten ngai mah se, han pawmzam mai turin a kal hmang leh a tihdan zia hian mi hip lo tawp, dik taka inphawrh chuan ka ngaina thei mawlh lo a ni ber mai. Amah ngaina tur leh pawm thiam ve mai tura min duhsaktu thiante ka hmaizah em avang zawkin, thinlung duhna tel hauh lovin ka han hnim hnai dawn chhin a, a teuh lo mai, ka Mizo tlawmngaihna pawh hian a tlin lo i han ti deuh charh mai teh ang. Taitesena emaw Vanapa te pawh ni se, ka Mizo rilru atanga ka han thlirsak hian, he thil kalhmang kher kherah hi chuan tlawmngai No Pui an dawng pha bik hauh lo vang.

                Ka hriat tirh phei kha chuan kuhva tui, patling ka chhunga leng tawh lo, Biak In bang mawi emaw bawlhhlawh bawm emaw a nih ngaihtuah chang lova han phuh darh khum chuai chuai mai hi ka nap a. Hei kher hi chu thianten min lo hmelhriattir hman hi pawi ka titawp thei lo va, nalh leh mawi ka ti bawk lo. Min sih hmuhtute han dem a mawi loh avangin ngawih liam mai ka’n tum pawh hian a rem ngang lo a ni. Heti khawpa ka lo engto va, ka duh loh chhan erawh han sawi fak tur hre chuang hauh si lo hian ka tei thei lul lo hi a ni ta ber mai a. He thil chungchanga ka rilru put hmang thianten an han hriatchian meuh chuan min kawhhmuhtu an nih kha pawi an tihnuhnawh leh a, a sawt tawh chuang si lo.

                A dik ka ti, ka tan chhan hi. He thil ka tih loh avang hian hna thawk peih lo mi vakrawlai ka nih bikna ka hre hauh lo.  Chunga thuneitute rahbeh leh hlawh pek kim loh vang pawh ni hran lo va, eng hna pawh nghet tak leh ziktluak taka thawk hman lo khawpa “hna-leh-lan-sam” chu ka ni bik lo tih ka inhria. Min duhsaktute aw-ka ngai pawimawh zo lova ni ka vui liam tum erawh chhiar tham awm ve mah se, mahni chil tiphuan tawk leh tawng titui tawk inhnangfakna tur chu ka thlantui hian a lei pha ve hrim hrim. Chu mi kawngah chuan mite meizial ban kual dun dun nih ka hlauh ber a ni bawk a, ka kuta zial tit-ek kai khawp chuan thianghlimna ka tlachham bikin ka inhre lo.

Mite min hmuh dan chu thu hran ni se, ka inhmuh danah ka induh tawk a. Miten ti mah se ka tih atan ka duh lova ka zui lo a ni mai alawm, tu pawi nge ka khawih? He thil hian tlangval piantha, tluantling, hmel tha tak pawh a tikhawr tut a, nula pian mawi sa pan thlerh thlawrh pawh hian a inhmeh chuang lo. He thil han hman mai tur hi ka zei lo ru riau va, ka thiam lo mai ni lovin han hman ve chhin eih pawh ka inthlahrung. Thianten tlangnel tak maia an han hman zaih zaih pawh hian ka lo awm thiam lo va, a mawi lohna mai ni lovin a awmzia nena inkawlkalhna te ka ngaihtuah chhuak bawk. Ka pian leh seilenna ramin a zir loh vang nge ni dawn, han tih ve chang pawh hian a bul tawi tut a, ka sawi tum leh kawhhmuh tum pawh thleng zo ta lovin ka hria a. Inralring tak maiin ka han khai chho a, tihthanna hian min tihzei beiseiin, ka han phawrh chhuak ve ngei mai a, a va’n remchang lo tak ngai em aw! Mahni tih ngai loh thil, mite tana thil tlanglawn tak leh hman nuam tak tih ve tul ta tlat mai hi zawng Chhurbura’n Hmawng kunga chaw chhum a tum ai khan harsa fe-in ka ngai zawk.

Kan ram leh ram thumnaa ka hman leh tawh loh tur tih thiam lo tum vak vak hian zan mang chhia a tisei thlawn mai mai tiin tih loh ka’n tum thin a, tuna kan chenna ram tihdan phung a nih tlat avangin ka hman ve loh chuan mi dangdai nih ka hlawh thei bawk si a. Hringnun hlutna tinep thei emaw Kristian nihna pawtpeh zawnga mite tih dan tha lo buanthluk theih hian kan inphal ngai lo. Thenrual inhmuh khàt chàm lawm nân Biar (beer) han tlak pap pap mai te, thiante hmaizah avang ngawt a, mahni duhthlanna hralh duh mi chu ni lovin ka inhre thin a, mahse ka chiang ngam chiah lo. Amaherawhchu tun lai mite tih dan alawm ti ve pawlh ringawt a, nulat tlangvalna hmang duhdahtu leh biar rim nam tihreh nan zu tui chiah zawr vaihlova pawlh kuhva khawr hmuam tun chunga Pathian biak inkhawm leh kohhran thiltih pelh duh hauh lote zingah erawh chuan ka thihni thleng pawhin chhiar telin ka awm hauh lo vang. Kawr var ka hak laia thinlung ngaihtuahna bal dum tluk, mite hmuh theih si loh chiang taka hmutu leh hretu hmaah, sual thupha chawi tur neih inhre ngai lo khawpa chapo birute zingah chhiar tel nih ka hlau ber a. Thiam ve thawkhat leh hre ve tawka inngaihna vilikin mi dangte chaldelh rantu nih phei zawng ka thisen hian ngam lul lo se tih ka ngiahtuah laia kawlphe aia chak, mahni induhtawkna leh chapona thinlung fahrah lutuk a lo thlawh phei zuai lai khan, thinlung hretu thil hriat theihzia hi mak chu ka ti; ngaihtuahna far khat leh rilru suangtuahna si per khat chauh pawh hi Ani chuan a hmuh thelh ngai si lo. “Tun lai mite tih dan alawm” tih hi mahni tisa duhzawng tih theihna chhuanlam laisen atan, sual ngaihzamna kamchhe tleuh nana hmang zeitute pawh hian, engkim Hretu leh Hmutu hmaah chuan kan la inpuang dawn tih kan hai mawlh si lo. Hmasawnna kawng tipingtu ngaih dan hlui leh tih dan phung tangkai tawh lohvina a sal-beh ka lo la ni ta cheu a niang chu, ka thianten “Hlui-ngaia” emaw “Hluizunthanga” ti tea min koh tak hi. Pawi ka ti chuang lo, ka tuar thiam tho. Mahse, chutiangin “tih dan hlui”zunzama phuarbeh ka nih reng ka lo inhre ngai lo. Hei hi ka chhahna lai tak pawh a ni ta ve ang.   Mahse chutianga zung kaih nei lo, buh si thli len bo ang maiin khawsak ka zuam bawk lo.

Tuna ka harsatna chu thil tha, mite chin than thil pawimawh, mahni lo tihthan ve loh,mawi pawh ka tih lem loh han hman hi a ni ber mai a. Mahni hnam nunphung leh sakhaw inrelbawl danah a tel tlat loh avangin leh kan seilenna hmun rama kan lo hman than tlat loh avang khan chu thil chu han hmang chhin tur pawhin “kan tihdan a ni lo” tihna rilru a lo zi chhuak a, chu chuan he thil thar hi mi laktir ngam lo leh thin. A hmanna hmuna awm si a, hmang ve thei lo han nih chu piansualna chi khat a nih miau avangin zawi zawiin, mite hriat vak lohvin ka han hmang tan ve ta a. Ni leh thla a inher rualin, ka lo hmang thiam tan ve ta a, tha lo mawi lo ka tihna rilru kha che te tein a kiam tial tial a. Ka zei ve tulh tulh a. Mizo lanu val rualte mawina leh hmelthatna timawi zualtu a lo ni zawk tih ka hmu chhuak ta zel a. A tira “kan tihdan a ni lo” tih nunphung hlui kulh bang chu zawi zawiin a chim riai riai a, danglamna leh thil pawimawh inthlakthlengna nun thar chu vartian ni eng zung mawi tak rualin hringnunah a rawn zam lut del del ta a. Hmasawnna khawvel thara chuangkai ve tur hian tih dan hlui, ngaih dan leh pawm dan hmasa zawk lak ata harsa ti taka kan tal chhuah a lo ngai reng mai a, hei hi hmasawnnaa piantharna nun dik lo zik chhuahna chu a ni tih ka hmu chhuak ta bawk a.

Khatih laia tih dan thar tha min kawhmuhtu ka thiante dem dawn dawna rilru ka lo put te khan mi tizak khawtlai a. Mahse, tunah chuan ka zak duh ta lem lo, he chin dan thar hi ngaihngam takin ka hmang ve thiam ta a, rual ka pawl ve ta bawk. Tin fuh loh leh kawk fuh lo anga ka lo inngaih thin kha thil kawh nan kut zungchal ka lo hman than vang chauh zawk a lo ni a. Kawk kualtu atan kut zungpui han hman hian nghet leh fuk takin a lo kawk fuh zaw mah a, zungchala kawh ai chuan a vin lo deuh bawk a, kawh sual palh changin han sut leh zauh pawh a awlsam zawk bawk lawm ni ka’n ti deuh ta duah a ni e. Tunah chuan thil kawh nan kut zungpui hi ka hmang thiam ve ta hle mai.  

                            

Mizo Thlangtlak dan chanchin

Mizote chanchin atangin kan chhui chuan kan pipute kha China/Tibet ram atangin Burmaah thlang an tla a. Burma ram Khampat Bungpui hmun atangin Tiau kamah, chuta tang chuan India ram hmarchhak tlangdung leh vangah thlang an tla ta zel a. Tuna Mizoram kan tihah khuan kum 1900 A.D. thleng khan mahni chi leh kuang hmun ram theuhvah awmhmun an bengbel tih theih a ni. Kum 1900 chawhma her atang chuan an lo hrillawk ang ngein Burma ram Kabaw phaikuam leh Tahan leh a chhehvelah thlang an rawn tla let leh ta a. Thlang an tlak hmaa an lo phun Phun Bungpui pawhin zar a lo thlak tawh reng bawk a. Tichuan Burma ramah Mizoten vangkhua kan din thar leh tan ta a ni. Kabaw Phaikuam hi khatih hun laia Burma sorkar roreltuten Mizote ram atanamin lo pek ram a ni a. Sap sorkar siam motor kawngpui dungah Mizo khaw thar kan din a. Khawbaw chhim zarah Hmuntha, Khampat, Kanan, Zohmun, Haizawl, Mawku, Namehan, Nankala te hia Mizote din, a hnam hlanga kan kawhsakna kan vangkhua te an ni a.Heng Mizo khaw khat leh khat inkarah Zo hnahthlak peng Zomiten khaw engemaw zat an din bawk a. Kabaw hmar lam zarah chuan Zo hnathlak peng, Kuki (Thado)ten motor kawng dungah vangkhua an din thar bawk a. Kabaw phaikuam khawpui chu Tamu a ni a. Tamuah pawh hian Mizo tam tak kan lo khawsa tawh thin a. Tamu khaw chhung leh a chhevelah Ngopa atangin North East India General Mission chuan Mizo tlangval thenkhat chu Missionary hna thawk turin a rawn tir chhuak a. Tuna Tamu khaw hmun laili, Bogouk lan (Bogouk road) kawngpui ding leh veiah kum 1985 bawr vel thleng kha chuan Mizoten hmun pawimawh ber ber kan luah a. Kum 1985 hnu lam atangin ei bar harsatna avangin kan in leh lo hmun tha tak tak kan hralh fai a, khaw dai fem leh dai kil lamah kan pem thin. Mizo chhungkaw tam tak chu Mizoram lamah ei bar zawnna kawng tha zawk beiseiin an pem nual bawk.

MIZORAMA BURMA MI RALTLANTE HNAWHCHHUAH THU

(Zonun group maila tih chhuah tawh a ni)
Han dilchhut ila. Electorial roll (vote list)-ah an tel loh avanga Mizoram chhuahsan tura thupek an nih bakah an hnawh chhuah chhan bik (specific reason) inthup emaw an State sorkar thuchhuah, an lehkha peka chuang a awm em le?  Skul kai chhunzawm an phalsak naupangte leh an chhungte inkara thil lo thleng tur hian ngaihtuah a ti tam hle mai. April thla lo de tur hi an tan chuan khawvela thil huphurhawm ber te zinga mi a ni ngei ang. An fate tel lova tiau ral kai tur hian thahrui an nei meuh ang em? An nu leh pa, u leh nau kim lova skul kai chhunzawm hi naupangten an tlin meuh ang em? Chutia chungkaw inthen phengphunga awm ai chuan tiin kawng tha dang zawh tur an hre mai ang em? Burma sorkar pek zirna thawleng tak zir aiin Mizoramah chhung kim lova, lungleng leh mittui kara zirna run tha belh chu an nu leh paten an fate an duhsak zawk ngeiin a rinawm a, mahse rin thu mai a ni.
Phaibawk khua atanga hnawh chhuahna hian Mizoram chhung khaw dang danga pem luh phalna a khap em le. Vaphai VC te hian politics-ah eng party nge an zui? Kawlrama retheihna leh khuahkhirhna khur thimah an kir leh ngam dawn si lo. An kal chhuah loh chuan YMA leh Vaphai VC ten an chenna in an thiahsak dawn bawk si a, khawiah nge an awm tak ang? An fate chuan tu in atangin nge skul an kai tak ang? Hawnna tur in an nei tawh lo vang a, an skul bang lo hawng, hlim taka lo hmuaktu tur an nei tawh bawk dawn si lo. Chutia rethei, riangvai leh chanhai lungngai taka an awm lai chuan Vaphai leh Phaibawk khuaa YMA memberte leh khaw chhunga kristiante chu Pathianniah Pathian be turin biak in kawng an zawh ngei ang a. Pulpil tlangah Pastor emaw upa emaw thuhriltu tu-in emaw chuan Pathian hmangaihna leh khawngaihna thupui hmangin emaw, an mi hnawh chhuahte chungchanga mahni thiam inchantirna lam hawi "Dikna" lam sermon, pakhat khat chu an thlak ngei ang a. Biak in chhunga Pathian fakna hla sak ri te chuan hnawh chhuah tuar, riah run vaite mittui a sawr chhuak tam ting dawn si a. YMA leh Vaphai VC te sunami, politics tuifawn tichhuaktu tuna sorkar dinglai lirnghing rapthlak leh na tak mai hi Mizoram kohhran hian a dang zo duh mawlh si lo.
YMA hian a hrawrawp mal te te-ah kristianna ziarang pakhat mah a keng tel lo va. Tuna an hnawh chhuah turte hi tu pawh niin eng pawh lo ni sela, sorkar thupek kengkawha rikrapna vilik tura inpeih YMA leh VC te kut atanga humhim turin kohhran tal an che dawn lawm ni? Mizoram Synod-a hotute, sorkar College, University, leh Bible College-a zirtirtute leh zirlaite hian Pathian hmangaihna leh kohhran dinchhan atangte hian mi chanhaite humhim hna hi hmanhmaw taka kan thawh a ngai ta. Ni a tlem ta hle mai. Mizorama artist te, ziakmite leh chanchinbu mite hian  thu leh hla hmangin raltlante tan thlamuanna leh himmuanna (security) lam kan au chhuahpui a va hun ta em!
Khawngaih phu lote khawngaih hi, hmangaih phu lote hmangaih hi, humhim phu thlawk lote humhim hna hi tu thawh tur nge ni ang le? Kristiante nge, sakhaw dang betute? Mizote nge hnam dang? Sorkar nge kohhran?
Aw, mahni in lum pawh luah thei lovin, thlabar leh lungngaiin an awm ang a, pawisawi lo naupangte chu ralti takin an awm ang a, tualchai zai an rel thei tawh bawk lo vang. Kal chhuahna tur khaw hmun dang an vai ang a. He dinhmunah hian "kan zo tlangram nuam" hi a chhunga chengten muan ti mah ila, kan Zorama Tlang lian leh tlang te-te hian a mi chengte khawsak duh dan avang hian nuam an ti meuh ang em aw.
Khual lam hla atang zawng, April ni 9 hmaa hnawh chhuah tuar turte tan tih theih kan va nei tlem tak em!!! An dinhmun tur ka ngaihtuah a, kan pian leh seilenna Burma ramin a zir loh vang tih loh chu tumah puhmawh tur ka hre lo.

 

Aw,...kan ngaih Zoramah mi firfiakten fei an hawl a,

Raltlan rethei, sial ang chhun e;

Hmangaih Pathian puan ang hnawl e.

Tuar zo ang maw, chhung tin tahna,

Chung leh Zua tel lovin maw,

Ka zuam lul lo, Zoram zirna run belh hi.

Chhung kim dar ang len lai ka ngai,

Ka hrai duhlai i tel lo chuan,

Hringnun dam ka huam lo.

Ngaih Zoram, nghilh ni awm lo’ng e,

Mahse, Sakei lu hrang, retheihna kam meiah,

I hraileng min barh min phal hi,

Dawn thiam a har, hril thiam a har,

Zobawm par mawi a chuai zo ve.

Ngaih Zoram, zahngaihte’n aw,

Tlawmngaih runrawng phum bo va,

Tlawmngaih politics hnuchhawnin,

Chhemdam thlir ianga chhemdamin,

Mi hrang, sa hrang, sorkar hrang lakah

Raltlan riangvaite bikna hmun sang,

Zo tlang nuamah chang zelin aw.

SUM KHAWVEL ( The World of Money)

Thuhmahruai:

            Khawvelah hian sum tel lovin kan khawsak thei lo va. Sumin khawvel a tuam a; hringnun a chei mawi a, hmasawnna chi hrang hrang a thlen thin. Sum chu rethei leh hausate thian rinawm, damlote damna kalkawng leh lungngaite hlimna, ram thara missionary-te puitu, mi thiamte hlawhtlinna rahbi, kohhran in leh lo leh insorkarna tiphuisuitu, chatuan nun hawlh tlang lo thil azawnga Pathian thilpek ropui tak a ni. Kawng danga thlir chuan, sumin nun tha a tingêt a, dikna leh thatna kengtute a phet thlu a, hringnun par mawi thliaka lung in bang zùttirtu, hriatthiamna nei lo, duhsak bik leh hleihbik nei lova thian siam thin, tûalthahna hmanrua, nupa tâng thentu, mûalphòna thlàn khura Rawngbawltute hnuk liamtu a ni.

  1. Sum chu engnge ni?

Chuti kauva mihringte phuar bet thei sum hian mihring hnathawh leh thil zawrh nena inthlakthleng nan mihringin a pawm theih thil eng pawh a huam vek a.[1] Bazarah chi leh chini emaw mizo chhang leh artui an inthleng; ni khat buhphun hlawh cheng 2000/- aiah miin thawmhnaw engemaw a lâk zawk chuan sum chu a chêngfaiin kawl lo mah se, a thawmhnawin a nei thung tihna a lo ni a. Tichuan sum hian mihring neih thil tangka leh rangkachak, in leh lo, arva leh ran vulh zawng zawng hi a fún tél vek a, a awmzia a zàu em avangin khawvel hi Sum Khawvel a tih theih ta hial a. Sumpai chu mihringte nun khawsak nana pawimawh ei-in leh silh leh fen kan neih theihna hmanrua a ni.

Sum hian mei angin mihringte thian leh hmelma nih a kawp a. A hmangtu hman dan azirin thatna leh chhiatna a thlen thin. Sum hi mihringte tana Pathian thilpek hlu tak a nih avangin min petu Pathian duhzawnga kan hman a pawimawh hle mai.[2] Chuvangin Lal Solomona’n “I sumin Lalpa chawimawi la, I thil lo pung hmasa ber zawng zawngte nen (Thuf. 3:9)” tiin min zirtir.

            Kan ramah hian sorkar huaihawtnaa din ni lem lo Pawl tam fe a ding ve ta a. Chung chuan retheihna leh mawlna laka tang mipuite chhanchhuah hna ropui tak an thawk thin. Ram chhung leh ram pawna mi thahnemngaite thilpek tlingkhawmin rawng an bawl a, mahni inphat tak meuhvin mite tan an inpumpek a ni. John Weselyan sum leh paia rawngbawlna lamah ringtuten tha thar thawha tan kan lak a tulzia a sawi a. Pathian fate kutah chuan sum  hi

(1).“riltamte tan chaw,

(2) tuihalte tan tui,

(3) saruak-a awmte tan silhfen a ni a, tin, sum hian

(4) hmelhriat ngai loh leh mikhualte tan riahbuk a buatsaihsak a;

(5) fahrahte tan pa nihna leh

(6) hmeithaite tan pa ber dinhmunah rawng a bawlsak thin a ni”[3] tiin Wesleya’n min hrilh.

2. Sum hman dan kawng thum[4]

(1)  Neih thil inthlakthlengna hmanrua

Tun hma chuan Indawr tawn nan bungrua chi khat khat an hmang thin a. Chinahovin mi hnenah suahdur an pe a, suahdur aiah an mamawh thil engemaw an la thin. Entirnan, tunlaiah tuibur al tâwk tak um khat hi mamawh inthlengna hmaruaah hmang ta ila. Miin tu emaw hnenah tuibur um khat a va pe ang a, fám artui lian tâwk pum sàwm la ta ang se la, chutiang atan chuan an hmang thin. Tin, bungrua leh bungrua a inthlengtawn thei angin cheng leh bungrua pawh a inthlakthleng thei bawk.

(2) Thil man sawifiahna hmanrua

Hun bi chhiar nan darkar, minit leh sekan kan hmang ang hian thil man sawi nan kyat, rupee, dollar  kan lo hmang ta a. Entirnan khaini bur khat chu K. 300/- man a ni a, K. 1000/-in DVD phek thum a lei theih a,  sum dahhimna mîkhàn tetta (safe box) fit hniha hlai, fit hnih leh a chanvea sang chu K. 500000/- man a ni.

(3) Ro khawlna hmanrua

Thenkhat chuan chêngfaia dahkawl aiin rangkachak suithi, emaw lunghlu bengbeh emaw leiin an dah tha khiau thin a. Tunlaiah thenkhatin leilet hi ro khawl nan an hmang, kum tin a lo buh chhuak an eì bakah a lei ram màn a thang chho zel bawk a, a hlawk dawbawl a ni. Kum 100 chuang kal taa kan Sap misawnariten chuanchung Methodist kohhran tan hmun leh hma, in leh lo tam tak an lo buatsaih sa diam maite han hmuh hian aw, an lo va thlir thui tak em! Rûkru leh tuiekin a ei chhiat theih loh, Lal Isua lo kalleh thlenga daih tur hmun leh hma ro hlu tak min lo khawlkhawmsak hi a va mak tak ngai em! An va han fakawm tak em!

Sawiho tur:

1.    John Weslaya’n Pathian fate kuta sum awmin hna a thawh dan kawng ruk a sawi angin kan chhungkua leh kohhran hian engtin nge rawng kan bawl ve theih ang le?

2.    Tuna kohhran hmun leh hma, in leh lo kan neihte hi kan duhtawk em? Mamawh kan la nei em? Engtin nge kan indin thar leh zel ang?


[1] Mizo tawnga sum leh Sap tawnga money hi a awmzia a inang a. The world book encyclopedia chuan money chu tihian a hrilhfiah: “Money is anyting that is generally accepted by people in exchange for the things they sell or the works they do,” tiin. The World Book Encyclopedia Vol. 13 (London: A Scott Fetzer Company, 1994), Sap tawnga Money tih a lo chhuah dan chu hetiang hian an chhui a. Hmanlai Rome-ho biak pathiannu (goddess) Juno-i koh duat nan Moneta tih hi an hmang thin a. Moneta tih hi Monere ( fuih, thurawn pe emaw warning) tih thumal atanga lak chhawn a ni a. Pathiannu biak in koh nan an hmang bawk a. Chu biak in sak nan mint an hmang a. Moneta chu mint an lo ti chho va. Chuta tang chuan ‘sum nemkaina (stamp for coining) leh sum/tangka (coin) tiin an lo hmang chho ta zel a ni. Latin tawng Moneta chu France tawngunah Moneie, an ti a, Saphovin Money tiin an hmang ta a ni. John Ayto, Bloomsbury Dictionary of Word Origins (Delhi: Goyl Saab, 1997), p. 353.

[2]Pawl sum vawn leh hman dan chungchangah Wesley clinic hmalâk dan leh kohhran hmabâk Dr. Than Bil Luaia’n a rawn ziak hi a lawmawm hle. Clinic-a harsatna an thawh dan te a rawn inpawrh chhuak phal hi a entawntlak hle bawk. Uluk taka ruahmanna karah Dr. Thana’n  “Office-a thùn tur thun duh lova lo hmang tâwk, pawisa hmuh zât lo zêp ru tâwk, thùn tur zât ziak (figure) lo tidanglam tâwk an bo bik lo,” a ti a. Chutiang ti thin thawktute chung thu erawh chu fel taka rel a nih thin bâkah an hna ata chawlhtir an nih thu a sawi bawk a. A ropui hle mai. Kristian Aw 218/19, February 2009, pp.21-22.

[3] Edward H. Sudgen, ed. John Wesley’s Fifty Three Sermons (Nasville: Abington Press, 1991), p. 636.

[4] B.C. 600 khan tuna Turkey chhak lam ram Lydia-ah khuan rangkachak leh silvar inpawlh, pawisa dere (coin) hmasa ber chu  an siam chhuak tawh a. BC 1100 daih tawh khan China ramah suahdur hi indawr tawnna hmanrua (neih thil inthlakthlengna hmanrua) atan an lo hmang tawh bawk. Lehkha puan pawisa (paper money) hi A.D. 600 bawr vel khan China ramah an hmang tan tawh tih Itali mi sumdawng  Marco Poloa’n AD 1200 khan a hmu chhuak a ni.

 

YMA Hnena Lehkhathawn 2002

 

Dear YMA hruaitu duhtakte,

Mahni han inhmelhriattir hmasa ila. Gospel Hrilvelthanga Ralte ka ni a. Tunah Trinity Theological College, Singapore-ah M.Th. (Systematic Theology) thesis ka ziak mek a. Kawlrama Methodist Church, Upper Myanmar Bible sikul (Myanmar Theological College)-a lecturer ka ni. Ka pa Rev.Dengkunga (1903-1977) hi Ngopa khaw chhuak, NEIG Mission-in 1925 kuma Kawlramah missionary-a a tirh chhoh, thih thlenga mahni ram kir ta lova Lalpa rawngbawltu a ni a.Ka pa kha kan piputen Kawl phai an chhuahsan hnuah an chhuahsan (thlangtlak) hmaa an phun Khampat Bungpui len lam teh hamsa bertu a ni. (Ref. B. Lalthangliana.) Pu B.Lalthangliana hi ka pa te, ka ute nen innel tak an ni. Ka chhungte chu Aizawl Zarkawt venga Pu Lalawia(late) tun hmaa Hotel Comfort neitu kha a ni. Ka patea a ni. Ka pianpui u leh nauten Mizoram an thleng vek tawh a.( Ka patea min thihsan hmain). Vawiin ni thleng hian ka la thleng hman ve lo va. Mizorama ka thisen zawmpui Mizote tan hian ka rilru ka pe thin. Hmannia YMA-ten hnam leh ram khawtlang tanghma ngaia Kawlram atanga lo lut(ral tlan) kan thisen zawmpui u leh naute in leh lo in ruahsak chanchin ka lo chhiar a. Pawi ka ti em em a. A hnuaia thu hi thinlungah tap chungin ka ziak ta a. Rilru leh tihtak zetin min lo chhiarsak ve dawn nia.

 Mizorama maid (in awmpui) tam zawkte chu Kawlrama zofate an ni a. Hna hram leh hna turu tak tak thawka inhlawhfain kan lo lut a. Burma sawrkar inthahna tual ata tal chhuakin in hulhliap kan rawn bel a. Lungngaihna leh chanhaina Kawr te lui tui chu kan kan mek a, hnung lamah kan hnam leh kan sakhaw (kristianna) tih mang tumin Buddhist-sorkarin min rawn um a, kan thlamuanna tur, kan hahchawlhna tur kan nu leh pate chenna Mizorama kan u leh nauten ral lehlamah thal leh fei-in min lo chang a: a kai hmasa apiang chu an lo chhun hlum hmiah hmiah zel a. Hnung lamah sahring ei-ten min chang a, hma lamah mahni unauten min hnawl a, min man a. Kal ngaihna hre lovin kawr te lui laiah hlau leh khura dingin lehlam rala kan thisen zawmpuite hnenah "aw..awi,, ka pute u, ka ute u, min lo chhan rawh u, min lo hum rawh u" tiin kan au lawm lawm a. Rethei leh fahrah te te kan hnih avangin kan zingah Mosia anga Tuipui sen vaw chat thei kan awm si lo. Thiam lo leh mi mawl te te kan nih avangin ral lehlama kan unaute mit kan tlung zo si lo. Khampat bungpui leh tiau lui tui te inunauna inhmangaihna te chu kan thinlung lairilah a zam a, a cham a. Rih lipui leh Vana Pa lam tual te inlaichinna chu lairilah hmuh chhuah thar zel a ni a. Mahse, tunah chuan hmelmate thihna puk ata tlan chhuakin unaute rawhtuina mei khurah kan tlan lut a." A tha e, a mawi e. Chung khuanu'n ngaidam rawh se. An thiltih hi an hriat loh vang a ni e" tia tawngtaisak chungin lem ralin kan awm mek zel a. Khawpui a lo ri a. Rairahte kan dinna lui hnar lamah chhum dum a lo chah muk muk tan a. Zahngaihna nei lo Kawr te tui lian chu nasa takin a tha neih zawng zawng hmangin a lo haw hum hum a, kan chhak lawkah a rawn vial thla tawp tawp a. Ral kuta inbarh thih aiin, kawr te tui lian lem hlum nih aiin unaute tanga an kut tuar chu a duhawm zawk a. Mangang leh lungngaiin, tap zawih zawih chungin tiau ral lam chu kan pan phei a. Kan em chhunga bal leh bahra te, kan ipte puia vaihmin leh fanghra rah te pawh kan tlan zo tawh a. Zorama u leh naute pek tura kan ken Kawlram tlangrama Chhawkhlei leh Tlaizawng parte pawh an vuai zo ta. Aw.. kan pi leh pu-te khuangchawina hmun ram Chindun lui dung leh Chinhill te chu luah thei lovin ralhovin min um chhuak a, pi pute lu nghahna leilung Mizoram dung leh vanga u leh nauten mikhual sual leh khual chimawm hri tha lo paiah min chhal si a. Kawr te tui lian a lo so va. Min rawn chim dawn ta! Tiau ral lehlama fei leh thala min lo changtu kan thisen zawmpui u leh naute hnenah, "ka pu ka pi, ka nu ka pa, u leh naute u, min chhan r'u, min khawngaih rawh u, in fei kibar ril tam leh thal fang thisen chak kha kan ngaina e, kan inpe e. Zoramah lu min phum tir hram rawh u." tiin kan ngen a, kan dil a. Tui lian rum ri hum hum chu kan chhak lawkah a rawn inhrosa tawh a. Khi... khi ta khi thingtuluang leh thing kung lian tak tak a rawn len thlakpui ta e.... tiau ral i kai ang u, tiau rala unaute tangah i va thi ang u... tiin...

aw.. Rairah kan chang sahring ei runah

Hnam leh Sakhaw timangtute ramah

Kan chau e, kan riang e.

Tiau rala unaute runah

Muana leh hlimna awmna ram chu belin

Kan tum ram pipute lenna runah

Lungngai leh luaithlinulin

Ar ang kan vai. Riah run vai e.

Tlawmngaihna fei leh thalin min lo chang e.

Khawngaihna hlum belah min bai e.

A na e. A na e.

Chung Pathian hmangaihnaah

Ngaidam turin kan hlan e,

 Rairahte thisen mawh nghilh tura'n

Chung Khuanu zahngaihnaah

Riangvaite phuba la lo tura'n

Ngaidam turin kan hlan e,

 Kan tap e. Kan ngen e.

 Mizoram hi vawi khat mah ka la thleng ve lo nan, kan ram a nihzia ka thinlungah a awm a. 1993 khan heti hian hla ka phuah nghe nghe a.

"Romei a zam, lenkawl a eng,

Tlai thla eng pawh a nguai riai e,

 Innghilh lo'ng aw, englai mahin

Khawi hmunah pawh leng mah ila.

Lo leng rawh u, Zo tlang nuamah

Zobawm lam nen kan hmuak ang che,

Rawn chhim ve la, Zonun par tluang,

Zo siktui thiang, Chhawkhlei par tlana'n.

Ral tlan in u leh naute hi in hulhliapah min lo hum leh hram turin ka han ngen che u a ni e. Hnam leh Sakhaw humhalhnaa in thahnemngaihpui Gospel Hrilvelthanga Ralte

 CC:(in fax)

1.       Pu Zoramthanga
 Mizoram Chief Minister
 2. Pu Tawnluaia
 Hon'ble Home Minister
 Government of Mizoram

(note: 2002-a thawn chhuah a ni)

EDEN THEI RAH EKONOMIK ( The Economics of Fruitful Garden of Eden)

 


“Bumin awm suh u; Pathian chu hmuhsit zia a ni lo ve; miin a theh apiang, chu mi vek chu a seng bawk dawn si a. Gal. 6:7”

  1. Khawvel hmasawnnain a nghawng

Mihring thiamna sâng zelin khawvel hi khawte pakhat anga thlir theihin a siam ta a. Inhriat pawh a awl a, sumdawnna kawng zau tak a inhawng bawk a. Ram hausa leh neinung zawkten ram hnufual zawk emaw ram changkang mêkte hnenah sumdawnna khurpui kawmpani lian tak tak an din a, mahni hlawkna chauh umin ram retheia rethei fate chungah duhamna kùt an thlak fo thin. Khawvel hi sumdawnna bazar lian tak ang a lo nih tâk avangin sum leh pai kan inzentawn vek ta a. Hmun khata thil man ret chuan hmun dang dang pawh a nghawng tel ta zel a ni.[1]

            Kan hmaah thil mit la tak a inpho teuh va. Silhfen leh in chhung bungraw neih thilah kan intlansiak a. Thil awlsam leh nuam umin kan che sâng tial tial a. Rim taka thawk siin sum khawl tur kan nei mang lo va. Thenkhatin sumdawnna sawtkat kawng kan zawh a, tum khata ruh tawk duhna khaidiatah kan inbarh lut leh thin a.

Kohhran hi kawmpani pakhat angin kan kalpui titih tawh a. Member leh hruaitu bengvar deuh thenkhatten thlarau purchawkna aiin taksa lam hlawkna sawrkhur atan kan hmang tan a. Kohhran tan tha leh sum thawh lama thahnemngai kan tlem sawt hle. Kohhran chhungah kawmpani baws (Boss) ang hrima thunei fe fe kan pung a, mahni ngaihdan chauh dik ber leh tha bera ngai hruaitu kan inchher ta nual emaw tih turin lam tang pawlitic kan vawrh lar a; mahni tanghmasial lova thawk tak taktu kan tlachham tual tual bawk si a. Pathian kohhran chu sumdawnna khur leh chi leh kuang inhmer bingna pawlitic mualah kan chantir ta em ni?

Inkalpawhna kawng leh inbiak pawh tawnna a changkang a. Biak in chhungah pawh hênfawnin hmun a chang ve tawh a. Thlarau leh tih tak zeta Pathian chibai buktu taktak kan awm ta lo emaw tih turin kan Pathian biak inkhawm a ro char zo ta. Pathian be tura inkhawm aiin thil, mit la thei chi hrang hrangah tlèina kan zawng thin a. Hna, dawr, zirlai leh thiante chhuanlamin Pathian leh a kohhran tan hun pe thei kan kiam a, hruaitu nihna chu puithuna pakhat anga hmangtu kan pung sawt hle. Hei hian kohhran din chhan ber misawn rawngbawlna lama kan ke pen a timuang mai ni lovin, a phuarbet thin a ni.

  1. Thei rah Ikawnawmika mihring tlatchhiatna

Tunlaia kan kohhran a thuanawpna chhan tak hi engnge ni ang le? Genesis 2:8-9 kan en chuan Eden huanah khan Pathianin lei atangin thil chi thum a totir tih kan hmu:

(1)    thing mit la tak leh ei mi tinreng a totir

(2)    nunna thing pawh huan lai takah a totir

(3)    a chhia leh a tha hriatna thing pawh a totir

Tichuan Pathianin mihring chu Eden huan enkawla veng turin a dah a, “huana thing tinreng rahte hi i duh duhin i ei thei e, a chhia leh a tha hriatna thing rah erawh hi chu i ei tur a ni lo; i ei chuan i ei ni la lain I thi ngei tur a ni” tiin thu a pe a (Gen. 2: 15-17).  Pathianin ei tura phalna a pek thing tinreng rah vék hmangin mihring chu Pathian khap thei rah ei turin thlemtu chuan kawng a sih hmuh ta a. Mihringin a ei a, Pathian thupek chu a bawhchhe ta a ni. (3:16).

Mihringin Pathian thupek a bawhchhiat chhan tak kha engnge ni? Bumna nge duhthlanna? Chapona nge duhamna? Thei rahah khan sual a inthup nge, a eituah? Pathian an duhna chapona chuan mihring rilru sutthlek dan a kuai her ngei mai a. Mahse Eden thei rah ikawnawmik tukverh atang chuan hetiang hian a khaikhawm theih a ni:

(1)  Eden huana thing rinreng rahah eng sual mah a inthup lo

(2)  Pathianin mihring chu hnianghnar takin a dah

(3)  A hun zawng zawng ei bar zawn buai nana hman tul lovin Pathian nena inpawlna hun hlu tak an nei thei reng

(4)  Mihring hi Eden huana thuthluang mai mai turin Pathianin a dah lo, Eden huan enkawl leh venhim hna a thawhtir a; thingin rah a chhuah that zel theih nan taima taka an enkawl a ngai.

(5)  Rûl hmanga bumnaah Pathian anga ropui leh thiltithei nih duhna chapona thinlung chuan duham takin sual a thlang ta

(6)  Pathian malsawmnaah lungawi zo ta lovin “awhna leh duhamna” thinlung a lo pu ta a.

(7)  Mihring duhamna chuan Pathian khap thil chu a pálzam a

(8)  Pathian thupek bawhchhiain an lo thi ta a.

(9)  Pathian ropuina an chang zo ta lo a ni.

 

Eden thei rah ikawnawmik atanga thlir chuan duhàm avangin mihringin sum leh pai lamah chhiatna rapthlak tak (bankrupcy) a tawk a ni a tih theih a.[2] Mihring tlatchhiatna chuan amah leh thil dang chungah nasa takin a nghawng ta a: (Gen. 3:15-24)

(1)  Silhfen nei lo khawpin an tlachhia a

(2)  Theipui hna chu an silhfen neih chhun a ni a

(3)  An hlau va, Pathian chu thing kung zingah an bihruksan a

(4)  Lei chu mihring avangin anchhe dawngin a lo awm ta

(5)  Rim taka an thawh chauhvin ei tur an hmu ang,

(6)  Leiin hling leh buar a chhuahsak ang a, leia thlai chu an ei ang

(7)  Hmaia thlantui luang zawih zawihin chaw an ei tawh ang

(8)  Vaivut an nih avangin vaivutah an kir leh ang.

(9)  Eden huan mawi atangin hnawhchhuah an ni

Duhamna chu mihringin kan mamawh aia tam neih kan chakna hi a ni a, Chapona chu kan phu tâwk dinhmuna lungàwi lohna leh tânghmasial taka dinhmun tha leh sang zâwk thlâkhlelhna a ni. Mimal leh chhungkaw mamawh tâwk a inang lo ngei ang. Kan mamawh tâwk tehkhàwng chu Dan thu leh Zawlneite thu zawng zawng khaikhawmna, Matthaia 22:35-36-a inziak, “Lalpa i Pathian chu

(1)  I thinlung zawng zawngin

(2)  I thlarau zawng zawngin

(3)  I rilru zawng zawngin i hmangaih tur a ni.

(4)  Nangmah i inhmangaih angin

(5)  I vengte pawh I hamngaih tur a ni (Mat.22:35-40) tih hi a ni.

Sawiho tur:

1.    Duhàmna leh chapona hi kan kohhran (member leh hruaitute) hri vei, sum hmanga Lalpa kan chawimawina kawng dipdaltu a nih theih dan sawiho ila. Heng hri tha lo laka invenhim dan leh a tihdamna kawng zawng bawk ila. (1Pet. 5:5b)


[1] Rev.Dr. Ngurliana’n glawbalaizesawn leh a vuakvet chi kua hetiang hian a tar chhuak: (1) khawvel a dam lo (2) thiamna lamah khawvel a inpumkhat (3) inhriat tawn theihna (communication) hian khawvel hi khawte pakhat angin a siam (4) khawvel culture a siam (5) sumdawnna pawh thluang lianpuiah a inher kual (6)khawvel pum hi sumdawnna bazar hmun pui pakhatah a din (7)mipui thuneihna ngaisang zawngin khawvel a thang chho (8) zinvah vel hi khawvel nihphungah a dah (9) khawte atanga khawpuia pem luh duhna a hring. Rev.Dr.Ngurliana, Globalization & Zofate (Mandalay: Mandalay Mizo Convention, 2009), pp. 15-16.

[2] Mihring suala a tluk hnuah mihring leh Pathian inkara inlaichinna, thlarauva inthlunna chu a chat, Pathian thupek a bawhchhiat avangin thihna anchhia ( thihna rorelna degree) chu mihring chungah a tla a. Pathian khawngaihna, Thlarau Thianghlim hmahruaina tel lo chuan tluchhe tawh mihring hian Pathian lam hawi kir duhna pawh a nei mai tawh lo a ni.  Tuna kan beihrual thupui atan hi chuan mihring tlukchhiatna/ thihna hi thlarau thihna mai ni lovin ikawnawmika (sum leh paia) mihring tlakchhiatna pawh a nihzia kan sawi tel duh a ni. Tichuan Pathian khap thil khawih avanga thihna chu mihring duhamna sualin a hrin chhuah ‘sum leh paia tlakchhiatna’ (financial bankrupcy) a ni pakhat bawk a.

 

TAP LO THEI KA NI LO

Thinglersava

Engin nge mi mawlh ka hre lo. Ka tirilah hian mi turtu engemaw hi awmin ka inhria a. Ka thlai chi tuh laklawk lai pawh sawi lo chuan ka ipte puiah ramvah chem tum ka khung a, hawn kawng ka zawh nghal ta mai a. Kan \hal huan sekawtrawlh ka thlen chuan kan huan mawng lama chizawl kung chhip zawna tlaitla tur ni, la inkhai vang vang chu ka han thlir a. A ni, tlai dang aiin feh ka hawng hma daih mai tia ngaihtuah chungin in lam ka pan phei zel a. Ka hmanhmaw deuh vang nge, ka haihawt vang zâwk tih ka hre thiam mai lo, tuithawl erawh thlâmah ka’n hnutchhiah pek chu le!

        Kan huan thlang lawka ‘tui nung lui” kan tih mai, a fur a thala kang ngai lo, ka daikai lai chuan, lui hnar lam atangin ri fiak sin, eng ri nge tih hriat chian mai theih loh chu  tlai thlifim chhem rual chuan mi rawn um zui niin ka hria a. Hriat chian tumin lui dung chu ka zawh thla ta zel a, tui dai ri awm lo turin dim te hian ka pen fimkhur hle a. Chu ri chu a lo hnai tial tial a, eng ri nge tih ka hre thiam lo tulh tulh a. Ka ding ta chawt a. Beng chhiin ri lo kalna lam chu zukpui lehhawi ang hlauh hian ka hawilet a. Chu veleh chu thawmri chu a reh a, tlai ni tlâk dawna thèreng zai thiam rùal zai tûi lai, thâwklehkhata an reh thuap ang ni lovin, a reh ri nghawng chu luidungah chuan a kháwk ràm ràm a, a kháwk rál raih ta mai a. Thil awmzia leh a ngaihna hre lovin kawrte lui laiah chuan tawkfang chu ka ngir deuh reng a. Tap ri nge nui ri tih pawh chian hman lova ka awm kha pawi ka ti a. Thli chhe ri mai nge, ka bengek tal chhuah tumte intawn ri ni ang tiin ka bengte chu ka han tuai deuh nawk nawk a. Eng dang zu ni suh tiin luidung lung kara chengkawl leh chakaite chu zanriah hmeh atan ka khawrh thla ta mai mai a.

        Chutia faifuk chunga lui dung ka zawh lai chuan ni china ka ri hriat tho kha lui mawng lamah, ka thlang lawkah a rawn ri chhuak leh ta riai riai a. Mak ka ti. Nichina a reh khawk ram ram lai khan mi lo kal pel a ni maw tiin ka ngaihtuah chhuak a. Mi zuankhahlen ngei ang le, te ka ti rilru neuh neuh va. Lo ngai rawh, ka hriat chian loh che-in i kal bo tawh hauh lovang tia insehruh teuh chung chuan chu thawm ri kal vel dan leh a thluk chu man fuh ka tum a. Chu ri chuan mi nghak emaw tih mai tur hian ka kàl chak leh a chak a, ka kàl muan leh a muang deuh va. Ka faifuk ri karah a ruk hian a rawn zâm lut a, hmanhmawh deuhva ka pen rik buan buan lai chuan a ri ring ve tial tial bawk a. Aw…enge i nih le? I hmuh theih si loh? I thawm ri lah mite hriat chian hlau niawm fahranin i zep ru thiam si a. Hmuh tur awm lo nafam chu mihring i ni lo phawt mai a. Benga hriat theiha ri i neih avang erawh chuan ri nei thil pakhat khat chu i ni ve ngei ang tiin chu ri chu ka rilruin ka bia a, ka zawt a. Mahse mi chhang hlek si lo.

        Kawla ni tla tur tlaitla êng mawi tak chuan leilung hi a mang\ha \an a. A êng no phêt mai a. Ka thlang lawka suar awmna kianga kawng pêng té pakhatah hlimthlâ pakhat pêng phei zuai hi ka hmu ta tlat mai a. A pian chu nula pian nalh, inkhaithli, sa pan thlerhthlawrh hi a ni. A hnung lam  chauh ka hmuh avangin pawi ka ti a. Khawi lam lânu nge, ni tlâk dâwn sur sura rawn inlâr ta ngawt chu? Lasi nula te hi a ni thei mai ang em? Ni ta se, enga ti nge a kal bo daih? Lasi nula chuan mi a rim a, a rawn pan hnai a, a lamah a zèl buai thin tih a nia. Tunah chuan hmuh fiah hlau niàwm takin a rawn inlan zawk a, a inthup bo leh daih mai si a. Hriat thiam a va har ve aw! A kal pènna lam chu rang takin ka pan phei ta a. Mahse hmuh phâk a ni ta lo. A inher liam zuai kha chu ka hmu chiang ropui si a. A ngaihna ka va hre ta lo em? Mi bo chu a ni lo phawt. Mi mangang tanpui ngâi nge ni dâwn? Mi mangang ni se, tanpuitu a zawng ngei dawn a. Piputen rauthlâ an tih hi nge ni dâwn tia ka ngaihtuah lai chuan nichina thawm ri tho kha ka hmazawna luidungah chuan a zaithla leh ta riai riai mai a.

        Hlimthlâ a rawn inlan hnuah chu thawm ri chuan awmzia a nei \an ta a, a thluk leh a thu chu ka hriat \han hla pakhat ang hi niin ka hria a. Ka han ngaihthlak chian meuh chuan ka hla ngainat em em, kan sak apianga ka rilru ngaihtuahna mi zúkfaitu chu a lo ni reng mai a. “Chu chu, mihring zai ri a ni” tiin ka au chhuak ta phawng mai a, hmeichhe zai ri, lung kuai tak, hnukulh teuh chung a, mittuiin mi a bual laia aw kehsawm ri, aw tliak, hla châng la zo lo, sak chhunzawm ngai dinhmuna zai ri chuan ka tirilah mi thám bet a, ka thin lairil berah a rawn zuang lut a, hnuk ulh teuh chung chuan ka rilruin ka lo sakpui ta a. Kachin rama Irrawdi lui pui, Maykha leh Melikha, lui thiang atanga rawn luang thla hum hum ang mai hian tah a chhuak a, mittui a sur titih nghal ta mai a. Chu zai ri chu ka ip chhunga ka lo chhar khawl, chèngkawl leh chakaite awrâwl angin ka iptepui atangin a rawn ri chhuak a. Kei hian heng pawisawi lo, luidunga nungchate hi chaw hmeh atan ka lo char khawm ringawt a. Hriat loh kara’n pawi ka lo khawih reng a nih hi tiin chung ka chawhmeh chhar nungchate chu luiah ka chhuah leh ta thuai thuai a. Chu veleh chu zai ri chuan hma a hruai a, keiin faifuka sakpuiin ka zui ta zel a. Riahrun bela lo haw sirva lengte inmangtha thawm riah chuan, inhmuh tawp zan, a tuk zing ni chhuak hmu leh tawh lo tur hre lawk anga lungchhe taka inthlahna tap ri ang maiin luidunga zai ri chuan ka thinlung a nghawr nghing a, mahni hmangaih lungduh tak chân avanga lutuk awm lova tap ri vawn vawn angte hian ka thinlung mi khawrh a.

         Hmel hmuh chian theih loh nula kha vawi khat chauhvin rawn inlar leh se ka ti hle mai a. Luidung tluana zai ri ka hriat kha, kha nula zai lo chu tu zai mah a nih theih ka ring lo. Kawlah ni a tla fel a, khuain thim zai a rel tan a, sirva lengten riah run an pan sap sap a, unau hmelhai an tih hun velah chuan khaw dâifêm ka thleng phei a. He lui hi khaw pumin rinpui bera kan neih khaw chhung bazar kianga luang thla zel a, thlangkawl khawdaiah lui dang nen zu inpawh ta kha a ni a. Khaw luh tawntirh dâifêm ka thlen chuan, nula zai ri chu a tham ral ta riai riai a, a khawk ri chu thangvan sangah a fáwn chho ván ván a. Ka rilruah tu emaw chân ang deuh thawin a thawk na a; luidung suartlaun ka rawn zawhpui, hla satu awm lo, awrâwl hriat theih si kha tu nge tih hriat hranpa ka tum lo nan, a reh ta vung vung mai kha chuan lung a tileng ang reng khawp mai.

        Ràl khat atanga thlirin, kan khaw lu lamah hian mei  lo inchhi var un hi ka hmu ta a. Zan danga awm ngai lo, eng thil tak thleng ang maw tiin hriat ka chak hle a. Ka hnaih tial tial a, nichin lawka tu tih hriat loh hmeichhe zai ri ang kha ka hre leh ta a. Mahse tun hi chu zai ri chauh a ni lo, nutling tap ri pawh a ang lam lam a, zai ri kara tap ri a ni. Ka rin ang ngeiin khawlua hmeithai inah thalai leh val upate an lo phusa mur mur a, thenkhatin meibal an lo chhi a, thenkhatin mandat an lo zar bawk a. Eng thil nge thleng ta? Chhiatna nge lawmna lam? tih hriat ka chak em em a.

         Tualzawla tlangval pakhat chu ka zawt ta chawt mai a. Ka thu hriat chu ka awih thei lo. A va mak tak em aw!. Hetiang reng reng hian maw khawvelah retheiten retheihna an tuar a, lungngaite lungngaihna a pun zel dawn ka ti a. Ka va pan hnai a, veng hnaivaia nu leh pa thenkhat an lo thu bial taih a, chu in pindan kilah chuan in neitu nu chu awrawl chau tak nen tapin a lo insut feih feih a. Ka han hawi vel a, ruang zalh ka hmu si lo. Hriatchian tumin feh haw thawmhnaw nen chuan in chhungah ka lut ve ta rawih mai a.  An in leh lo neih chhun tiralin, Ram thumna kal tura inbuatsaiha ram hnihnaa khawsak mek, a kal chhuah hmaa kohhran leh khawtlanga inhmang ve tak, ram hnihna a thlen hnua hnam leh kohhran hlamchhiah a zu leh nawnsitbawlna khura cheng, a nu leh naute enkawl zui nachang pawh hre ta lo, an fapa chu zan khat thilthu maiah a damlo thut a, damdawi in pawh lut hman ta lo chuan a thiante in (room)ah a liam ta mai a ni, tih min lo hrilh a.

        Ka pawi ti lutuk chu ka hawihai reng mai a. Hmeithai lusun, khawngaihthlak tak chu ka thutchilh a, thlamuanna tawngkam han hnemna tur ka tlachham hle a. Hmanni lawk khan ram thumna thleng tawh, kan khaw bazar venga mi neinung ve tak fanu pawh ral hla atangin sunna inkhawm kan nei tawh a. Chu mi chuan hnam dang, sakhaw mi lo zet mai nen hian innei si lovin nupa angin an chengdun a, chu pa nena an fawr velnaah palh an tawk a, a boral ta kha a ni a. Chutianga ram leh hnam tana kan lo beisei em em, tuipui ral kai chin, kan fanaute, nu leh pa, kohhran leh khawtlang kilkawina khauh leh fel hnuaia awm lova, an khawsak dan turte ka ngaihtuah lai chuan, veng nu leh pa kalkhawm chhun chhun chuan khawhar hla, luidung tluana tu tih hriat lohvin a tihrik hla ngei kha an sa a. “Tap lo thei ka ni lo aw ka lainate kha” tih hla an sak lai chuan hmeithai lusun khawngaihthlak tak chuan, kun tlawk tlawk chungin “Aw, Mama, a va pawi tak em! Ka kiangah awm la hetiang tak hian chhiatna rapthlak i tawk kher lo tur. Tunah i kiangah ka awm thei si lo, tap lo thei hi ka ni lo a sin, Mama,” tiin tah hla a chham a.

Recent Prayer Requests

  • Kohhran Kum thar inthlanna

    Tamu Methodist kohhran chuan ni 5 Jan chhunah Kohhran dan dinglai No. 43(e) (ii): Full member zawng zawngin Stewards mi 8, Leaders mi 10 leh Kohhran aiawhte mi 10 nominate-in th...
  • Damlo Tv. Chhandingliana tan

    Tamu Methodist kohhran thalai, Tv. Chhandingliana chuan ni 23 Dec, 2013 zan khan nasa takin accident a tawk a, Imphal damdawi inah zai a ni a. Pathianin min la chelhsak avangin ...